1 маусым – Балаларды қорғау күні. Бұл күн – елімізде өсіп келе жатқан жас буынның құқықтары мен қауіпсіздігіне, олардың жан-жақты дамуы мен әл-ауқатына ерекше көңіл бөлінетін маңызды кезең. Қазақстан Республикасының Президенті Қасым-Жомарт Тоқаевтың тапсырмасына сәйкес, Үкімет пен Оқу-ағарту министрлігі балалардың қорғалуын қамтамасыз етуге бағытталған нақты және жүйелі саясатты жүзеге асыруда. Бұл бастамалар еліміздегі әрбір баланың бақытты балалық шағын қамтамасыз етіп қана қоймай, сапалы білім алып, қауіпсіз ортада тәрбиеленуіне мүмкіндік береді.
Бүгінде Қазақстанда 6,9 миллионнан астам бала тұрады. Оның ішінде 3,9 миллионы – мектеп оқушылары, 1 миллионнан астамы – мектепке дейінгі ұйымдарға барады, ал 556 мыңнан астамы – техникалық және кәсіптік білім беру ұйымдарында оқиды. Осындай ауқымды балалар қауымының құқықтарын қорғау, оларға лайықты тәрбие мен білім беру – мемлекеттің басты міндеттерінің бірі.
2024 жылы балалардың қауіпсіздігі мен құқықтарын қорғау саласында бірнеше маңызды заңнамалық өзгерістер орын алды. Атап айтқанда, жетім балаларға тәлімгерлік жүйесін енгізу, буллингке қарсы күрес, мектептердегі қауіпсіздікті арттыру және кәсіби патронаттық тәрбиені дамыту мәселелері қамтылды. Бұл бағытта қабылданған үш негізгі заң балалардың қорғалу деңгейін едәуір арттыруға ықпал етті.
Балалардың әл-ауқатын жақсарту үшін 2025 жылдың 1 шілдесінен бастап кәсіби қабылдаушы отбасы институты заңды түрде енгізіледі. Бұл бастама – ерекше мұқтаждыққа ие балаларды тәрбиелеуде жаңа сапалы тәсіл қалыптастыруға бағытталған әлеуметтік модель.
Сонымен қатар, білім беру инфрақұрылымын жақсарту мақсатында Президенттің бастамасымен жүзеге асырылып жатқан «Келешек мектептері» ұлттық жобасы аясында елімізде 460 мың орындық 217 жаңа мектептің құрылысы қолға алынған. Қазіргі таңда 105 мектеп пайдалануға берілді, оның 44%-ы ауылдық жерлерде орналасқан. Жалпы алғанда, 2019 жылдан бері 1200 мектеп салынып, 1 миллионнан астам оқушы жаңа оқу орнымен қамтылды.
Мектепке дейінгі біліммен қамту деңгейі де айтарлықтай өсті. Қазіргі таңда 2 жастан 6 жасқа дейінгі балалардың 93,1%-ы мектепке дейінгі тәрбие мен оқумен қамтылған. 2025 жылға қарай бұл көрсеткіш 95%-ға дейін жеткізіледі. Бұл мақсатта жаңадан 64 мың мектепке дейінгі орын ашу жоспарланған.
Жас ұрпақтың амандығы – ел болашағының кепілі. Сондықтан да балалардың қауіпсіздігі мен жан-жақты дамуына бағытталған мемлекеттік саясат әрдайым басты басымдықтардың бірі болып қала береді.
