Саясаткерлер алаңға барып, халықтың алдында сөз сөйлей бастады, – деп хабарлайды Azatmedia.kz ақпараттық порталы 24.kg сайтына сілтеме жасап.
Бішкектегі Ала-Тоо алаңында митинг әлі жалғасып жатыр. 2018 жылы 11 жылға сотталған экс-депутат Садыр Жапаров митингке қатысқандар тарапынан бостандыққа шыққан.
“Мен үш жарым жыл түрмеде отырдым. Сіздердің арқаларыңызда бостандыққа шықтым. Біз бір нәрсені еске сақтайық: қырғызбыз ба, орыспыз ба, өзбекпіз бе, бәріміз бір елде тұрып жатырмыз! Бәрін заң аясында шешейік. Қазір тарауымыз керек. Күшпен ештеңе шешпейміз. Бәрібір заңсыз болады”, – деді экс-депутат.
Садыр Жапаровты халық зор ықыласпен қабылдады. Саясаткердің пікірінше, парламент болашақта бір палаталы болғаны дұрыс.
Айта кету керек, алаңдағы мінберден сөйлегендердің арасынан Садыр Жапаровты президент етіп тағайындау туралы ұсыныстар да айтылды.
